एस ए टिभी, काठमाडौँ – हिमालय एयरलाइन्सले २०२६ जुन ४ (बुधबार) देखि काठमाडौँस्थित त्रिभुवन अन्तर्राष्ट्रिय विमानस्थल (TIA) र चीनको शेन्जेन बाओ’आन अन्तर्राष्ट्रिय विमानस्थल (SZX) बीच नियमित सीधा उडान सेवा सुरु गर्ने घोषणा गरेको छ।

यो नयाँ सेवासँगै हिमालय एयरलाइन्स काठमाडौँ–शेन्जेन–काठमाडौँ रुटमा निर्धारित सीधा उडान सञ्चालन गर्ने इतिहासमा पहिलो र एकमात्र व्यावसायिक एयरलाइन्स बन्ने भएको छ। यो कदम नेपाल र चीनबीचको हवाई सम्पर्कलाई अझ रणनीतिक रूपमा विस्तार गर्ने महत्वपूर्ण उपलब्धि मानिएको छ।

शेन्जेनलाई चीनको “सिलिकन भ्याली” भनेर चिनिन्छ। यो शहर प्रविधि, वित्त, उत्पादन र नवप्रवर्तनको प्रमुख केन्द्रका रूपमा विकसित छ। त्यहाँ ठूलो संख्यामा व्यवसायिक यात्रु र प्रविधि कम्पनीहरूको उपस्थिति रहेकाले नयाँ रुटले नेपाल–चीन बीचको व्यापारिक तथा जनस्तरको सम्बन्ध थप मजबुत बनाउने अपेक्षा गरिएको छ।

हिमालय एयरलाइन्सको यस रुटले पर्यटक आगमन बढाउने र होटल तथा पर्यटन क्षेत्रलाई थप गतिशील बनाउने अपेक्षा गरिएको छ।

सुरुवाती चरणमा एयरलाइन्सले हप्तामा दुई वटा उडान सञ्चालन गर्नेछ। काठमाडौँबाट उडान मंगलबार र बिहीबार राति २१:५० बजे प्रस्थान गर्नेछ भने शेन्जेनबाट फर्किने उडान बुधबार र शुक्रबार बिहान ०५:५५ बजे सञ्चालन हुनेछ।

उडान तालिका अनुसार:

काठमाडौँ–शेन्जेन (KTM–SZX): मंगलबार र बिहीबार, २१:५० प्रस्थान, ०४:३०+१ आगमन

शेन्जेन–काठमाडौँ (SZX–KTM): बुधबार र शुक्रबार, ०५:५५ प्रस्थान, ०८:३५ आगमन

एयरलाइन्सका उपाध्यक्ष विजय श्रेष्ठले यो रुटलाई कम्पनीको “नयाँ युगको सुरुवात” रहेको बताउदै यात्रुहरूलाई सुरक्षित र गुणस्तरीय सेवा प्रदान गर्ने प्रतिबद्धता व्यक्त गरेका छन्। उनका अनुसार माग बढ्दै गएमा उडान संख्या पनि बढाइनेछ।

टिकटहरू एयरलाइन्सका आधिकारिक काउन्टर, ट्राभल पार्टनर, वेबसाइट र मोबाइल एपमार्फत बुक गर्न सकिनेछ।

हिमालय एयरलाइन्स सन् २०१४ मा नेपाल–चीन संयुक्त लगानीमा स्थापना भएको हो। कम्पनीसँग हाल ४ वटा विमान छन् र यसले मध्यपूर्व, दक्षिण एसिया र चीनका विभिन्न गन्तव्यमा सेवा दिँदै आएको छ। सुरक्षा, गुणस्तर र सेवा सुधारमा केन्द्रित रहँदै एयरलाइन्सले पछिल्ला वर्षहरूमा धेरै अन्तर्राष्ट्रिय मान्यताहरू पनि हासिल गरेका छन्।

यो नयाँ काठमाडौँ–शेन्जेन रुटलाई नेपालका लागि हवाई कनेक्टिभिटी र आर्थिक अवसर विस्तार गर्ने महत्वपूर्ण कदमका रूपमा हेरिएको छ।